2014 წლის 5 აპრილს, ყოფილ მსჯავრდებულს,  თ.წ.-ს  საქართველოს სსკ-ის 180-ე მუხლის მეორე ნაწილის „ბ“ და მესამე ნაწილის „გ“ ქვეპუნქტით - თაღლითობა, ანუ მართლსაწინააღმდეგო მისაკუთრების მიზნით სხვისი ნივთის მოტყუებით დაუფლება, რამაც მნიშვნელოვანი ზიანი გამოიწვია, ჩადენილი არაერთგზის,  ფაქტზე ბრალი წარედგინა.

გამოძიების თანახმად,  2011 წლის დასაწყისში, N5-ე დაწესებულებაში მოთავსებული მსჯავრდებული თ.წ.  ასევე მსჯავრდებულ ლ.ხ.-ს დაუმეგობრდა  და ნდობის მოპოვების შემდეგ დაპირდა, რომ 10 000 ლარის სანაცვლოდ, შეწყალების კომისიაზე მისი გათავისუფლების დადებითად გადაწყვეტას შესძლებდა.

ლ.ხ.-მ  2011 წლის ივლისიდან დეკემბრამდე პერიოდში, შვილის ს.გ.-ის დახმარებით თ.წ.-ს დედის სახელზე, საქართველოს ბანკის მეშვეობით 9 950 ლარი გადარიცხა.

აღსანიშნავია, რომ თ.წ. ამჟამად გათავისუფლებულია, ხოლო დაზარალებული ლ.ხ. ისევ სასჯელაღსრულების დაწესებულებაში იხდის სასჯელს.

აღნიშნული მუხლით ჩადენილი დანაშაული, სასჯელის სახით 6-დან 9 წლამდე თავისუფლების აღკვეთას ითვალისწინებს. საქმეს სასჯელაღსრულებისა და პრობაციის სამინისტროს საგამოძიებო დეპარტამენტი იძიებს.